ក្អួតលែងចេញ ក្រោយដឹងខ្លួនថាបានផឹកទឹកត្រាំសាកសពតារាឯកស្រីជាង ១១ខែ
ក្រោយរសជាតិទឹកម៉ាស៊ីនប្លែក ប្រជាជនមួយចំនួនធំបានប្ដឹងអាជ្ញាធរ ហើយនៅពេលអាជ្ញាធរបើកគំរបអាងស្ដុកទឹកដើម្បីពិនិត្យមើលទើបដឹងថា មានសពតារាសម្ដែងស្រីដ៏ល្បីល្បាញម្នាក់របស់ប្រទេសមិចស៊ីចកូត្រាំក្នុងនោះដោយសាកសពមានសភាពហើមស្អុយរលួយ។
គេហទំព័រ Mirror បានចុះផ្សាយនៅថ្ងៃទី១៣ មករា កន្លងទៅថា សពដែលត្រូវបានគេប្រទះឃើញត្រាំនៅក្នុងអាងស្ដុកទឹកសម្រាប់ប្រើប្រាស់ក្នុងខុនដូមួយកន្លែងគឺជារបស់តារាឯកស្រី Carmen Yarira Esparza Noriega វ័យ២៧ឆ្នាំ ដែលបានបាត់ខ្លួនតាំងពីខែកុម្ភៈឆ្នាំ២០១៤កន្លងមក។
ក្រោយប្រជាជនរស់នៅក្នុងអគារខុដូ បានប្ដឹងទៅសមត្ថកិច្ចពីរសជាតិទឹកប្រើប្រាស់ដែលមានរសជាតិប្លែក បណ្ដាលឱ្យសមត្ថកិច្ចទៅបើកគំរបអាង នឹងបានជួបសពរបស់តារាសម្ដែងស្រីអណ្ដែតមកទើនឹងគំរបអាងក្នុងអគារខុនដូដែលនាងរស់នៅក្នុងក្រុងមិចស៊ិចកូតែម្ដង។
ក្រោយត្រលប់ពីទៅហាត់ប្រាណនៅ Fitness កាលពីខែកុម្ភៈ ឆ្នាំមុនរួច គ្មាននរណាម្នាក់បានជួបឬឃើញនាងទៀតទេ ដូច្នេះសមត្ថកិច្ចបានសន្និដ្ឋានថា នាងអាចត្រូវគេពួកក្រុមរត់ពន្ធមនុស្សចាប់ពង្រត់ទៅលក់ ប៉ុន្តែក្រោយពីការស៊ើបអង្កេតមិនមានដានឬដំណឹងអ្វីទាំងអស់ រហូតក្រុមគ្រួសារនាងសម្រេចបោះពុម្ពរូបនាងដើរបិទតាមទីសាធារណៈ ក្នុងទីក្រុងដើម្បីប្រកាសតាមរកនាង ប៉ុន្តែនៅតែមិនមានដំណឹងនាងដដែល។
ថ្វីត្បិតតែសភាពសាកសពមានលក្ខណៈហើមស្អុយខ្លាំង ប៉ុន្តែសពខាងលើត្រូវបានគេអះអាងថាជាសពរបស់តារាសម្ដែងស្រីដ៏ល្បីរូបនេះយ៉ាងពិតប្រាកដព្រោះសមត្ថកិច្ចរកឃើញសារធាតុពីការធ្វើការវះកាត់កែសម្ភស្សនៅលើសារពាង្គកាយនៅកន្លែងតែមួយ ចំណែកសាកសពនាងត្រូវបានបញ្ជូនទៅមន្ទីរពិសោធន៍ដើម្បីស្រាវជ្រាវរកមូលហេតុនៃការស្លាប់ហើយ។
មនុស្សដែលរស់នៅក្នុងអគារខុនដូនោះម្នាក់ៗព្រឺរសម្បុរគីង្គក់ រអើមតែក្អួតមិនចេញនៅពេលដឹងខ្លួនថាពួកគេបានប្រើប្រាស់ទឹកដែលមានត្រាំសាកសពមនុស្សអស់រយៈជាង១១ខែមកហើយ។
តាមការសន្និដ្ឋានសមត្ថកិច្ចបានឱ្យដឹងថា ការស្លាប់របស់នាងអាចពាក់ព័ន្ធនឹងរឿងរ៉ាវស្នេហាត្រីកោណ ព្រោះនាងធ្លាប់បានសេពគប់ជាមួយអ្នកធុរកិច្ចម្នាក់ ប៉ុន្តែនាងបានផ្លាស់ប្ដូរទៅសេពគប់ជាមួយអ្នកច្បាប់ម្នាក់វិញ មិនតែប៉ុណ្ណោះបុរសអ្នកធុរកិច្ចរូបនោះក៏ជាអ្នកចេញថ្លៃឈ្នួលខុនដូឱ្យនាង ម្យ៉ាងវិញទៀត នាងបានបាត់ខ្លួននៅមួយសប្ដាហ៍មុនការកំណត់រើចេញពីខុនដូដែលនាងរស់នៅនោះផងដែរ៕
ប្រែសម្រួល៖ សុខា នីកា
ប្រភព៖ www.eonline.com
