កន្ទុយបារី៨០តោនត្រូវក្រុមហ៊ុន ប៉ែន លឹម ត្រេឌីងគ្រុប នាំចូលមកចោលនៅកម្ពុជា
អាជីវករម្នាក់នៅក្រុងសៀមរាបឲ្យដឹងថា ក្រុមហ៊ុន ប៉ែន លឹម ត្រេឌីងគ្រុប បាននាំចូលកន្ទុយបារី៨០តោនពីប្រទេសវៀតណាមមកចោលនៅកម្ពុជា ក្រោមរូបភាពជាជីកសិកម្មធម្មជាតិ ។
អ្នករកស៊ីដឹកជញ្ជូនទំនិញម្នាក់ លោក ប៊ុន សែនស៊ុន ប្រាប់ VOD កាលពីល្ងាចថ្ងៃទី០៨ ខែកុម្ភៈថា កាលពីចុងឆ្នាំ២០១៤ ក្រុមហ៊ុន ប៉ែន លឹម ត្រេឌីងគ្រុប បានជួលលោកឲ្យដឹកទំនិញប្រហែល៣០តោន ពីព្រំប្រទល់ប្រទេសវៀតណាមត្រង់ចំណុចច្រកព្រំដែនត្រពាំងផ្លុង ក្នុងខេត្ដត្បូងឃ្មុំ យកទៅខេត្តព្រះវិហារ ហើយបន្តដឹកមកខេត្តសៀមរាប កាត់តាមស្រុកអន្លុងវែង ។ លោកថា ពេលមកដល់ព្រៃស្អាកស្ថិតក្នុងស្រុកអន្លុងវែង ខេត្តឧត្តរមានជ័យ ក្រុមហ៊ុនប៉ែន លឹម បានឲ្យលោកទម្លាក់ទំនិញនៅទីនោះ២០តោន ហើយនៅសល់ប្រហែល១០តោនទៀត ឲ្យលោកយកទៅរក្សាទុកនៅខេត្តសៀមរាប ។ លោកបន្ដថា តាមលិខិតពីរសន្លឹកដែលក្រុមហ៊ុនផ្ដល់ឲ្យលោក គឺទំនិញដែលលោកដឹកនោះជាជីធម្មជាតិ សញ្ញាដើមថ្នាំជក់ ដែលក្រុមហ៊ុនមានសិទ្ធិនាំចូលពីបរទេសទម្ងន់៨០តោន ។ តាមលិខិតនោះឲ្យដឹងដែរថា ជីកសិកម្មនោះត្រូវបានវិភាគដោយមន្ទីរពិសោធន៍កសិកម្ម និងមានការទទួលស្គាល់ពីអគ្គនាយកដ្ឋានកសិកម្មផងដែរ ។
កន្ទុយបារីដែលដឹកមកទុកចោលនៅខេត្តសៀមរាប (រូបថត៖ បូ សាវី)
លោក ប៊ុន សែនស៊ុន បន្តថាជីប្រហែល១០តោននោះ លោកបានយកទៅផ្ញើនៅផ្ទះមិត្តភក្តិជាងបីខែមកហើយ ទើបតែប៉ុន្មានថ្ងៃនេះមិត្តភក្តិនោះប្រាប់ថា ការ៉ុងជីនោះបែកធ្លាយ ចេញមកសុទ្ធតែកន្ទុយបារី មានក្លិនមិនល្អ ធ្វើឲ្យប៉ពាល់ដល់សុខភាព ។ លោកបន្ថែមថា មិត្តភក្តិលោកបានជូនដំណឹងពីករណីនេះទៅអាជ្ញាធរមូលដ្ឋានឲ្យទៅ ពិនិត្យមើលហើយ ចំណែកលោកបានព្យាយាមទាក់ទងឲ្យប្រធានក្រុមហ៊ុន ប៉ែន លឹម ត្រេឌីងគ្រុប ឲ្យយកជីកសិកម្មនោះទៅរក្សាទុកវិញជាច្រើនលើក ប៉ុន្ដែប្រធានក្រុមហ៊ុនមិនលើកទូរសព្ទ ។
លោក ប៊ុន សែនស៊ុន សង្ស័យថាជីកសិកម្មនោះមានភាពមិនប្រក្រតី ព្រោះក្រុមហ៊ុននោះគេចវេសមិនមកទទួលយកទៅរក្សាទុកឲ្យបានត្រឹមត្រូវ ហើយម្យ៉ាងទៀតតាំងពីពេលលោកដឹកជីកសិកម្មនោះមកទុកនៅសៀមរាប ក៏ក្រុមហ៊ុនមិនទាន់ទូទាត់ថ្លៃសេវាដឹកជញ្ជូន និងថ្លៃកម្មករនៅឡើយ ។ លោកបញ្ជាក់ថា បើសិនកន្ទុយបារីទាំងនោះជាជីកសិកម្មធម្មជាតិមែន ប្រហែលប្រធានក្រុមហ៊ុនមិនទុកចោលនោះទេ ។
VOD ព្យាយាមទាក់ទងលោក ប៉ែន លឹម ប្រធានក្រុមហ៊ុនប៉ែន លឹម ត្រេឌីងគ្រុប ជាច្រើនលើក ប៉ុន្ដែទូរសព្ទចូលមិនមានអ្នកទទួល ។
អភិបាលរង និងជាអ្នកនាំពាក្យខេត្ដសៀមរាប លោក ប៊ុន ថាឬទ្ធិ មានប្រសាសន៍ថាលោកមិនទាន់ទទួលលព័ត៌មាននេះនៅឡើយទេ ប៉ុន្ដែលោកថា លោកនឹងស្នើទៅសុំយោបល់ពីអភិបាលខេត្ដ លោក ឃឹម ប៊ុនសុង ទៅពិនិត្យលើករណីនេះ ។
ប្រធានអង្គការសេដាក លោក យ៉ង់ សាំងកុមារ មានប្រសាសន៍ថា ជីធម្មជាតិមិនត្រូវគេផលិតចេញពីកន្ទុយបារីនោះទេ ។ លោកថា ការធ្វើបែបនេះទំនងជាមានការក្លែងបន្លំ យកកាកសំណល់ពីបរទេសមកចោលនៅកម្ពុជា ។ លោកអំពាវនាវឲ្យមន្ត្រីជំនាញផ្នែកកសិកម្មត្រួតពិនិត្យបញ្ហានេះ ឲ្យបានត្រឹមត្រូវ ៕ ប្រភពៈ VOD
