Facebook ទម្លាយឲ្យដឹងថា រដ្ឋាភិបាលសុំមើលព័ត៌មានឯកជនកើនដល់២៥%
ការស្នើសុំរបស់រដ្ឋាភិបាលទៅបណ្ដាញសង្គម Facebook បានកើនឡើងប្រហែល២៥ភាគរយក្នុងពាក់កណ្ដាលឆ្នាំ២០១៤នេះ ច្រើនជាង៦ខែឆ្នាំកន្លងទៅ។ នេះបើតាមការឲ្យដឹងពីក្រុមហ៊ុនបណ្ដាញសង្គម Facebook ផ្ទាល់។
ក្នុង៦ខែដំបូងនៃឆ្នាំ២០១៤នេះ រដ្ឋាភិបាលនៃប្រទេសនានាជុំវិញពិភពលោកបានធ្វើការស្នើសុំមើលទិន្នន័យរហូតដល់៣៤ ៩៤៦ កើនឡើង២៤ភាគរយ ក្នុងរយៈពេលដូចគ្នាក្នុងឆ្នាំ២០១៣។ ក្នុងអំឡុងពេលដូចគ្នានេះដែរ ព័ត៌មាន រូបភាព ឬពាក្យសម្ដីលើ Facebook ដែលប៉ះពាល់ទៅនឹងច្បាប់ក្នុងប្រទេសទាំងនោះក៏កើនឡើងប្រហែល១៩ភាគរយដែរ។
“យើងក៏កំពុងស្វែងរកដាក់ពាក្យទៅតុលាការកំពូលដើម្បីធ្វើឲ្យយុទ្ធនាការនេះក្លាយជាសុពលភាព ហើយឲ្យរដ្ឋាភិបាលទាំងនោះយកសំណើររបស់គេត្រឡប់ទៅវិញ”។ នេះបើតាមការអះអាងរបស់ក្រុមហ៊ុនបណ្ដាញសង្គមនេះសរសេរលើ Blogpost កាលពីថ្ងៃអង្គារ។
ចំណែកក្រុមហ៊ុន Google ធ្លាប់បាននិយាយកាលពីខែកញ្ញាថា ខ្លួនក៏ទទួលការសំណើពីរដ្ឋាភិបាល់ប្រទេសនានាឲ្យបង្ហាញព័ត៌មានអ្នកប្រើប្រាស់សម្រាប់ករណីស៊ើបអង្កេតឧក្រិដ្ឋកម្មកើនដល់១៥ភាគរយដែរ ក្នុងពាក់កណ្ដាលឆ្នាំ២០១៤នេះ៕
ប្រភព៖ theguardian
