ឃាតកដែលសម្លាប់ស្រីស្នេហ៍ នៅក្នុងផ្ទះសំណាក់ ត្រូវជាក្មួយដែលប្តី យកមកចិញ្ចឹម
រាជធានីភ្នំពេញ ៖ កម្លាំងនគរបាល ព្រហ្មទណ្ឌ នៃអធិការដ្ឋាន នគរបាល ខណ្ឌពោធិ៍សែនជ័យ បានប្រើពេលតែប៉ុន្មានម៉ោងប៉ុណ្ណោះ ក្នុងការស្រាវជ្រាវ តាមចាប់ជនសង្ស័យ ដែលសម្លាប់ ស្ត្រីម្នាក់នៅក្នុងផ្ទះសំណាក់ អប្សរាមាស ស្ថិតនៅភូមិប៉ប្រ៉កខាងត្បូង សង្កាត់កាកាប ខណ្ឌពោធិ៍សែនជ័យ កាលពីបេលាម៉ោង ១៩និង៣០ នាទី ព្រលប់ថ្ងៃទី៣១ ខែតុលា ឆ្នាំ២០១៤ ហើយអ្វីដែលគួរឲ្យ ចាប់អារម្មណ៍បំផុតនោះ គឺឃាតកដៃឆៅ ត្រូវជាក្មួយថ្លៃ របស់ស្ត្រីរងគ្រោះ និងត្រូវជាក្មួយបង្កើតរបស់ប្តី។
មន្ត្រីនគរបាល បានបញ្ជាក់ថា ជនសង្ស័យ ដែលត្រូវចាប់ខ្លួន មានឈ្មោះ សុខ សុផា អាយុ៣១ ជាអ្នករត់ម៉ូតូឌុប ហើយជនសង្ស័យ ត្រូវជាក្មួយថ្លៃ របស់ស្ត្រីរងគ្រោះ ហើយបច្ចុប្បន្នមកស្នាក់ នៅជាមួយពូ និងស្ត្រីរងគ្រោះ នៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។ ក្រោយមកជនសង្ស័យ ដែលស៊ីបាយបោកឆ្នាំង បានលួចទំនាក់ទំនង ស្នេហាលួចលាក់ ជាមួយមីងថ្លៃ រហូតនាំគ្នាឡើងផ្ទះសំណាក់ ហើយមិនដឹងជាមានរឿងអ្វី ទើបឈានដល់រឹតកសម្លាប់ បង្កឲ្យមានការភ្ញាក់ផ្អើល កាលពីថ្ងៃត្រង់ទី៣១ ខែតុលា ឆ្នាំ២០១៤។
សូមរំលឹកថា សាកសពស្ដ្រីម្នាក់ ត្រូវបានអ្នកបម្រើ នៅផ្ទះសំណាក់ អប្សរាមាស ប្រទះឃើញដេកស្លាប់ នៅលើគ្រែ ដោយមានស្នាមរឹតក នៅក្នុងបន្ទប់លេខ១០ កាលពីវេលាម៉ោង ១២ថ្ងៃត្រង់ ទី៣១ ខែតុលា ឆ្នាំ២០១៤ ស្ថិតនៅតាមផ្លូវបេតុង ក្នុងភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ខណៈដែលអ្នកបម្រើឡើង ទៅរៀបចំបន្ទប់ ។ ស្ត្រីរងគ្រោះមានឈ្មោះ យ៉ាន់ វុទ្ធី អាយុ ៣០ឆ្នាំ មានប្ដីឈ្មោះ ប៉ែន វណ្ណី អាយុ ៤៥ឆ្នាំ មុខរបររត់តាក់ស៊ី មានទីលំនៅផ្ទះលេខ២១ ផ្លូវលេខ៣១០ ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
_______________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
