អ្នកមានជម្លោះដីធ្លីជំរុញ ឲ្យចាប់ខ្លួនលោក កែប ជុតិមា និងមន្ត្រី១១រូបទៀតករណីពុករលួយ
អ្នក
មានជម្លោះដីធ្លីនៅរាជធានីភ្នំពេញ ប្រមាណ១០០នាក់ នៅថ្ងៃចន្ទនេះ
ជំរុញឲ្យអង្គភាពប្រឆាំងអំពើពុករលួយចាប់ ខ្លួនមន្ត្រីរដ្ឋាភិបាល
១២រូប មកផ្តន្ទាទោស ដោយពួកគេចោទថា
អ្នកទាំងនោះជាប់ពាក់ព័ន្ធនឹងអំពើពុករលួយ
រឿងជម្លោះដីធ្លីនៅតំបន់បឹងកក់។
មុនដាក់ពាក្យបណ្តឹងទៅអង្គភាពប្រឆាំង
អំពើពុករលួយ នៅថ្ងៃទី៧ខែកក្កដាឆ្នាំ២០១៤នេះ តំណាងអ្នកភូមិបឹងកក់
អ្នកស្រី ទេព វន្នី ប្រាប់អ្នកសារព័ត៌មានថា ជាងបីឆ្នាំមកនេះ
អាជ្ញាធរមូលដ្ឋាន មិនទាន់បាន
អនុវត្តអនុក្រឹត្យរបស់លោកនាយករដ្ឋមន្ត្រី
ដែលកាត់ដីនៅតំបន់បឹងកក់ ជាង១២ហិកតា
ចេញពីក្រុមហ៊ុនស៊ូកាគូអ៊ីន ឲ្យអ្នកភូមិនៅឡើយទេ។
ស្ត្រីរូបនោះបន្តថា ផ្ទុយទៅវិញ
ដីជាង១ហិកតាត្រូវក្រុមហ៊ុនកាត់លក់ដោយខុសច្បាប់
ទៅឲ្យក្រុមហ៊ុនបរទេស រីឯដីកំពុងមានជម្លោះមួយចំនួន
ត្រូវអាជ្ញាធរអនុញ្ញាតឲ្យសមត្ថកិច្ចធ្វើការិយាល័យ
ហើយអាជ្ញាធររាជធានី បានចេញប័ណ្ណកម្មសិទ្ធិមួយចំនួន
ឲ្យអ្នកដែលមិនរស់នៅតំបន់បឹងកក់ជាដើម។
អ្នកស្រីទេព វន្នី ចាត់ទុកថា ទង្វើនេះបង្ហាញថា អាជ្ញាធរកំពុងឃុបឃិតគ្នាប្រព្រឹត្តអំពើពុករលួយ។
តំណាងអ្នកភូមិម្នាក់ទៀត លោក ចាន់
ពុទ្ធិស័ក្តិ ដែលរដ្ឋាភិបាលធ្លាប់ចាប់ឃុំខ្លួន
ជិត៥ខែដោយសារចេញមុខតវ៉ានោះ បានចេញមុខវ៉ាម្តងទៀត អះអាងថា
មានប្រជាពលរដ្ឋជាង៤០គ្រួសារទៀត
ដែលអាជ្ញាធរមិនទាន់ចេញប័ណ្ណកម្មសិទ្ធិ ឲ្យនៅឡើយ ដែលករណីនេះ
លោកយល់ថា ធ្វើឲ្យអ្នកភូមិចេញតវ៉ាស្ទើរាល់ថ្ងៃ។
លោក ចាន់ ពុទ្ធិស័ក្ដិ
ជំរុញឲ្យអង្គភាពប្រឆាំងអំពើពុករលួយ
បើកការស៊ើបអង្កេតលើភាពមិនប្រក្រតីលើមន្ត្រីទាំង១២រូបនោះជាបន្ទាន់
ដើម្បីជំរុញការអនុវត្តអនុក្រឹត្យរបស់រដ្ឋាភិបាលឲ្យមានប្រសិទ្ធភាព។
តាមពាក្យបណ្តឹងរបស់អ្នកភូមិ ឲ្យដឹងថា
មន្ត្រីដែលពួកគេប្តឹងថាជាប់ពាក់ព័ន្ធនឹងអំពើពុករលួយនោះ
រួមមានប្រធានក្រុមហ៊ុនស៊ូកាគូអ៊ីន លោក ឡៅ ម៉េងឃិន
អតីតអភិបាលរាជធានានីភ្នំពេញ លោក កែប ជុតិមា អភិបាលរងខណ្ឌដូនពេញ លោក
សុខ ពេញវុធ អភិបាលរាជាធានីលោក ប៉ា សុជាតិវង្ស
និងមន្ត្រីមួយចំនួនទៀត ។ VOD
មិនអាចស្វែងរកប្រតិកម្មពីប្រធានក្រុមហ៊ុនស៊ូកាគូអ៊ីន
និងជាសមាជិកព្រឹទ្ធសភាមកពីគណបក្សប្រជាជនកម្ពុជា លោក ឡៅ ម៉េងឃិន
បានទេនៅព្រឹកថ្ងៃចន្ទនេះ ខណៈអ្នកនាំពាក្យសាលារាជធានីភ្នំពេញ លោក
ឡុង ឌីម៉ង់ បានចុចបិទទូរស័ព្ទជាច្រើនដង។
ក្រោយដាក់ពាក្យបណ្ដឹង
តំណាងអ្នកភូមិអះអាងថាមន្ត្រីនៅស្ថាប័នប្រឆាំងអំពើពុករលួយមួយនេះ
បានសន្យាយកសំណើរបស់អ្នកភូមិទៅពិចារណា មុនចាត់វិធានការ។
មន្ត្រីស៊ើបអង្កេតជាន់ខ្ពស់នៅអង្គការ
លីកាដូ លោក អំ សំអាត ដែលតាមដានករណីនេះ ឲ្យដឹងថា
ភាគីក្រុមហ៊ុនស៊ូកាគូអ៊ីន
បានចុះកិច្ចសន្យាជួលដីនៅតំបន់បឹងកក់ពីសាលារាជធានី
បើក្រុមហ៊ុននោះលក់ដីមួយផ្នែកទៅឲ្យក្រុមហ៊ុនណាមួយ
ដូចពលរដ្ឋចោទប្រកាន់មែន នោះវាជាទង្វើខុសច្បាប់។
លោកជំរុញឲ្យស្ថាប័នជាតិមួយនេះបើកការស៊ើបអង្កេតករណីនេះឲ្យមាន
តម្លាភាព ដើម្បីជម្រះមន្ទិលដល់អ្នកតវ៉ា
និងដើម្បីបំបាត់និទណ្ឌភាពនៅកម្ពុជា៕
ប្រភពពី vodhotnews.com
