លួចម៉ូតូបាន ជិះលក់នៅភ្នំពេញ បីថ្ងៃ អត់ដាច់ ជិះទៅស្រុកវិញ ម្ចាស់ដើមចាប់ជាប់
កណ្ដាល:
ម្ចាស់ម៉ូតូបានចាប់ខ្លួនជនសង្ស័យម្នាក់ ជាចោរលួចម៉ូតូ
ប្រគល់ឲ្យសមត្ថកិច្ចកាលពីថ្ងៃទី២៨ ខែកក្កដា ឆ្នាំ២០១៤ វេលាម៉ោង ៣
និង ២០ នាទី រសៀល ដល់ភូមិទួលក្រសាំង ឃុំរកាខ្ពស់ ស្រុកស្អាង។
ជនសង្ស័យ បានលួចម៉ូតូគុបជ្រុង ១ គ្រឿង កាលពីបីថ្ងៃមុន
ហើយជិះដើរលក់នភ្នំពេញ ប៉ុន្តែគ្មានអ្នកទិញ
ក៏ជិះម៉ូតូមកស្រុកស្អាងវិញ ក៏ម្ចាស់ឃើញចាប់ខ្លួនតែម្តង។ជនរងគ្រោះឈ្មោះ ប៉េង ហ៊ត ភេទប្រុស អាយុ ៣១ឆ្នាំ ជាកសិករ មានទីលំនៅភូមិសំប៉ានលើ ឃុំព្រែកអំបិល ស្រុកស្អាង ខេត្តកណ្តាល។ ចំណែកជនសង្ស័យឈ្មោះ ម៉េង ឌឿន ភេទប្រុស អាយុ ១៧ឆ្នាំ មានទីលំនៅភូមិសំប៉ានលើ ឃុំព្រែក អំបិល ស្រុកស្អាង ខេត្តកណ្តាល (ឃាត់ខ្លួន) និងដកហូតវត្ថុតាង ម៉ូតូម៉ាកគុបជ្រុងសេ ៥០ ចំនួនមួយគ្រឿង ពណ៌ទឹកប្រាក់ ពាក់ស្លាកលេខ ព្រៃវែង 1A.7734។
នគរបាលបានបញ្ជាក់ពីសភាពរឿងហេតុថា នៅថ្ងៃទី ២៦ ខែកក្កដា ឆ្នាំ២០១៤ វេលាម៉ោង ១២យប់ នៅចំណុចភូមិសំប៉ានលើ ឃុំព្រែកអំបិល ស្រុកស្អាង ខេត្តកណ្តាល ឈ្មោះ ម៉េង ឌឿន បានលួចម៉ូតូម៉ាកគុបជ្រុង សេ៥០ ជារបស់ឈ្មោះ ប៉េង ហ៊ត ដែលទុកចោលនៅសំយ៉ាបផ្ទះឪពុក ឈ្មោះ ប៉េង នៅភូមិសំប៉ានលើ។
ពេលលួចម៉ូតូបានហើយឈ្មោះ ម៉េង ឌឿន ជិះសំដៅទៅភ្នំពេញ ដើម្បីរកអ្នកទិញម៉ូតូ។ ឈ្មោះ ម៉េង ឌឿន ដេកនៅផ្ទះសំណាក់រយៈពេលពីរយប់ ពុំមានអ្នកទិញម៉ូតូក៏ជិះម៉ូតូត្រលប់មកផ្ទះវិញ នៅថ្ងៃទី២៨ ខែកក្កដា ឆ្នាំ២០១៤ វេលាម៉ោង ៣និង២០នាទីរសៀល ដល់ភូមិទួលក្រសាំង ឃុំរកាខ្ពស់ ស្រុកស្អាង ទើបម្ចាស់ម៉ូតូឃាត់ខ្លួនឈ្មោះ ម៉េង ឌឿន និងម៉ូតូប្រគល់មកឲ្យសមត្ថកិច្ចនគរបាលស្រុកស្អាង ដើម្បីប្រមូលផ្តុំសំណុំរឿងតាមនីតិវិធី៕
ប្រភពពី CEN
