យុជនម្នាក់ត្រូវក្រុមក្មេងស្ទាវ ជិះម៉ូតូធាក់ម៉ូតូផ្តួល រួចវាយបណ្ដាលឲ្យរបួសធ្ងន់
រាជធានីភ្នំពេញ៖យុវជនម្នាក់ រងរបួសធ្ងន់ខណៈដែល កំពុងជិះម៉ូតូហើយត្រូវបាន ក្រុមក្មេងស្ទាវមួយក្រុម ធាក់ផ្តួលរួច វាយ កាលពីវេលាម៉ោង១០ និង១០នាទីយប់ថ្ងៃទី២១ខែតុលា ឆ្នាំ២០១៣ ត្រង់ចំណុច មុខធនាគាកាណាឌីយ៉ា តាមបណ្ដោយមហាវិថីព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ ។
សាក្សីបាននិយាយថា មុនពេលកើតហេតុ គេឃើញយុវជនម្នាក់ ជិះម៉ូតូម៉ាកគុបជ្រុង៥០ ពណ៌ស្លែ ពាក់ស្លាកលេខ ភ្នំពេញ 1A – 5472 ធ្វើដំណើរតាមបណ្ដោយមហាវិថីព្រះមុនីវង្ស ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានក្រុមក្មេងស្ទាវ១ក្រុម ជិះម៉ូតូ៣ គ្រឿង មិនចាំស្លាកលេខ ធ្វើដំណើរ ស្រប់ទិសគ្នា មកក្បែរ ហើយធាក់ម៉ូតូយុវជនខាងលើ បណ្ដាលឲ្យដួល រួចក៍ ចុះវាយ បណ្ដាលឲ្យរងរបួសធ្ងន់ ។ បន្ទាប់មកជនបង្ក បានឡើងជិះម៉ូតូគេចខ្លួនបាត់ស្រមោលតែម្តង។
ភ្លាមៗ សមត្ថកិច្ចបានចុះទៅដល់ចំណុចកើតហេតុ និងទាក់ទង ហៅរថយន្តសង្គ្រោះបន្ទាន់ មកទទួលយកទៅសង្គ្រោះ តែជនរងគ្រោះមិនព្រម ទៅព្យាលបាលនោះទេ៕
ប្រភពពី ANN