ពលរដ្ឋរងគ្រោះដោយទឹកជំនន់ នៅប៉ោយប៉ែត ដែលតវ៉ាជាមួយមេភូមិ ទទួលអំណោយ
ខេត្តបន្ទាយមានជ័យ: ពលរដ្ឋ មួយចំនួនក្នុងចំណោមអ្នកតវ៉ានឹងមេក្រុម និងចៅសង្កាត់ករណីថា ត្រូវគេបំបាត់ឈ្មោះ ចេញពីបញ្ជីទទួលបាន អំណោយពីលោកជំទាវ ម៉ៅ ម៉ាល័យ កែ គឹមយ៉ាន ភារិយាលោកឧបនាយករដ្ឋមន្ត្រី កែ គឹមយ៉ាន កាលពីល្ងាចថ្ងៃទី១៨ តុលា ២០១៣ នៅផ្សារមង្គលប៉ោយប៉ែត សង្កាត់ក្រុងប៉ោយប៉ែត។
លោក ង៉ោ ម៉េងជ្រួន អភិបាលក្រុងប៉ោយប៉ែតនិយាយថាៈស្ថានភាពទឹកជំនន់នៅក្រុងបានស្រកចុះ ហើយហើយ ចំពោះមុខពលរដ្ឋ ត្រូវបានស្រង់ឈ្មោះ និងកំណត់ស្ថានភាពរងប៉ះពាល់ ព្រមទាំងអាទិភាពដើម្បីទទួលបានអំណោយសង្គ្រោះបន្ទាន់។ កន្លងមកក្រុង ទទួលបាន អំណោយសង្គ្រោះបន្ទាន់ពីកាកបាទក្រហមកម្ពុជា ពីអង្គការការីតាស់កម្ពុជា តែពុំទាន់គ្រប់ចំនួនពលរដ្ឋរងគ្រោះទេ។
លោក ង៉ោ ម៉េងជ្រួន សម្រន់ចិត្តពលរដ្ឋដែលមានកំហឹងព្រោះតែតវ៉ានឹងមន្ត្រីមូលដ្ឋានករណី ពុំបានអំណោយនិងសុំទោសពួកគេ ចំពោះការឆកល្វែងនេះ ហើយសុំមានការយោគយល់។
ក្នុងនោះ គេបានជ្រើសរើសពលរដ្ឋ១៣០គ្រួសារដែលភាគច្រើនជាស្ត្រី ក្រីក្រនិងមានកូនតូចៗក្នុងបន្ទុកម្នាក់ច្រើន មកទទួលអំណោយរបស់លោកជំទាវម៉ៅ ម៉ាល័យ កែ គឹមយ៉ាន ដែល១គ្រួសារៗទទួលបានអង្ករ៣០គ.ក្រ មី១កេះ នំធុង១ធុង ប៊ីចេង១កញ្ចប់។ ស្ត្រីមានទារកបានការឧបត្ថម្ភលុយបន្ថែមទៀត។
លោកស្រី នួម សុភ័ណ អ្នកតំណាងរាស្ត្រមណ្ឌលបន្ទាយមានជ័យ ក្នុងនាមលោកជំទាវម៉ៅ មាល័យ មានប្រសាសន៍ថាៈ ជំនួបដោះស្រាយទុក្ខលំបាកពលរដ្ឋរងគ្រោះដោយទឹកជំនន់លើកនេះក៏មក ថ្លែងអំនរគុណ ដល់ពលរដ្ឋបោះឆ្នោតអោយ គណបក្សប្រជាជនកម្ពុជា ឈ្នះសម្លេង ភាគច្រើនលើសលុប និង ចូលរួមទុក្ខលំបាក បងប្អូនគ្រប់កាលៈទេសៈ។
លោកជំទាវ ម៉ៅ ម៉ាល័យ និងប្រតិភូស្ត្រីជាភរិយាថ្នាក់ដឹកនាំបានចែកអំណោយនិងសួរសុខទុក្ខ ដ៏ស្និទ្ធស្នាលជា១ពលរដ្ឋ៕