ក្រហើយមានទុក្ខទៀត ធ្វើកម្មករសំណង់រកលុយចិញ្ចឹមកូនស្រី ត្រូវឡានកិនខ្ទេចក្បាល
ខេត្តកណ្តាល ៖ បុរសម្នាក់ត្រូវបានរថយន្ត មិនស្គាល់ម៉ាកបើកបុក និងកិនខ្ទេចក្បាលមួយចំហៀង ធ្លាយខួរប្រកាច់ស្លាប់ យ៉ាងអាណោចអាធ័ម នៅលើទ្រូងផ្លូវ កាលពីវេលាម៉ោង ៤រសៀលថ្ងៃទី២១ ខែតុលា ឆ្នាំ២០១៣ នៅលើកំណាត់ផ្លូវជាតិលេខ៤ ត្រង់ចំណុចភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល ។
ជនរងគ្រោះមានឈ្មោះ ទួន ចាន់ធូ អាយុ ២៥ឆ្នាំ ជាកម្មករសំណង់បម្រើការងារ នៅតំបន់សេដ្ឋកិច្ចពិសេស ជិតកន្លែងកើតហេតុ រស់នៅភូមិត្រពាំងព្រៃ ឃុំសែនដី ស្រុកសំរោងទង ខេត្តកំពង់ស្ពឺ ជាបុរសពោះម៉ាយ ទើបលែងលះប្រពន្ឋបាន ៥ខែ។ ជនរងគ្រោះធ្វើកម្មករចិញ្ចឹមកូនស្រីអាយុ ៥ឆ្នាំ និង ម្តាយមេម៉ាយ ។ សពជន រងគ្រោះត្រូវបានម្តាយ ដឹកយកទៅធ្វើបុណ្យតាមប្រពៃណី នៅស្រុកកំណើត ដោយក្តីសោកសៅ ហើយគ្រប់ៗគ្នា បានសំដែងក្តីអាណិតអាសូរ យ៉ាងក្រៃលែង។
មុនពេលកើតហេតុ ជនរងគ្រោះជិះម៉ូតូម្នាក់ឯង ម៉ាកសង់កូរ៉េ ព៌ណក្រហម ពាក់ស្លាកលេខ 1C 6273 បើកបរក្នុងទិសដៅ ពីកើតទៅលិច លុះដល់ចំណុចកើត ហេតុ ស្រាប់តែមានរថយន្តមួយគ្រឿង ដែលសាក្សីខ្លះអះអាងថា ជារថយន្តក្រឡុក ស៊ីម៉ង់ត៍ និងខ្លះថារថយន្តកូរ៉េ បើកក្នុងទិសដៅបញ្ច្រាសទិសគ្នា កៀរដួល បណ្តាលខ្ទាតជនរងគ្រោះ បោកចូលកង់រថយន្ត កិនបែកក្បាល ធ្លាយខួរស្លាប់ភ្លាមៗនៅកន្លែងកើតហេតុ ហើយអ្នកបើកបររថយន្ត បានបន្ថែមល្បឿន បើករត់បាត់ស្រមោល៕
_____________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
