ចាប់ជនសង្ស័យជួញដូរគ្រឿងញៀនជិត១ពាន់គ្រាប់ ព្រមទាំងអ្នកប្រើប្រាស់២នាក់នៅក្រុងសិរីសោភ័ណ
បន្ទាយមានជ័យ ៖ ជនសង្ស័យជាអ្នកជួញដូរគ្រឿងញៀនម្នាក់ ព្រមទាំងអ្នកប្រើប្រាស់ចំនួន២នាក់ទៀត ត្រូវបាននគរបាលការិយាល័យប្រឆាំងគ្រឿងញៀន នៃស្នងការខេត្តបន្ទាយមានជ័យធ្វើការឃាត់ខ្លួនកាលពីវេលាម៉ោង៣និង៣០នាទីរសៀលថ្ងៃទី២១ តុលា ម្សិលមិញ នៅចំនុចខាងលិចស្ពានទឹកថ្លា ក្នុងភូមិសង្កាត់ទឹកថ្លា ក្រុងសិរីសោភ័ណ ខណះកំពុងធ្វើសកម្មភាពចែកចាយ។
លោក ធិន ស៊ិនដេត នាយការិយាល័យនគបាលប្រឆាំងគ្រឿងញៀន នៃស្នងការនគរបាលខេត្តបន្ទាយមានជ័យបានអោយដឹងថា បន្ទាប់ពីទទួលបានបញ្ជាពីលោក សេង ស៊ុម ស្នងការខេត្តរួច លោកបានដឹកនាំកំលាំងធ្វើការស្រាវជ្រាវរកមុខសញ្ញាជួញដូរគ្រឿងញៀន រហូតឈានដល់ការបង្ក្រាប់ឃាត់ខ្លួនជនសង្ស័យម្នាក់ឈ្មោះ រស់ សាយ៉ន ហៅ ប៉ែន ភេទប្រុស អាយុ៣៧ឆ្នាំ មានទីលំនៅភូមិព្រហូត សង្កាតអូរអំបិល ក្រុងសិរីសោភ័ណ ខេត្តបន្ទាយមានជ័យ ជាមួយគ្រឿងញៀនប្រភេទមេតំហ្វេតាមីចំនួន៥កញ្ចប់ថង់ពណ៍ខៀវតូចស្មើនឹង៨០២គ្រាប់ បន្ថែមជាមួយនិងមួយថងទៀតដែលរាប់មិនបានព្រោះជនសង្ស័យបោះចូលទឹក និងអ្នកប្រើប្រាស់២នាក់ទៀតដែលបានទូរស័ព្ទមកទិញគ្រឿងញៀនពីជនសង្ស័យ។
បើតាមលោក ធិន ស៊ិនដេត បន្ទាប់ពីការឃាត់ខ្លួន ជនសង្ស័យរួមជាមួយគ្រឿងញៀន និងអ្នកប្រើប្រាស់ទាំង២នាក់ ត្រូវបានសមត្ថកិច្ចនាំខ្លួនទៅស្នងការខេត្តដើម្បីសួរចំលើយ ហើយនាំខ្លួនទៅឆែកឆេរនៅផ្ទះដើម្បីរកជនជាប់ពាក់ព័ន្ធផ្សេងទៀត៕
ប្រភពពី ANN
