ឆន សុវណ្ណរាជ រងការរិះគន់ តាមរយៈការចម្លងបទចម្រៀងថៃ
ភ្នំពេញ: បទចម្រៀងរបស់តារាចម្រៀង ឆន សុវណ្ណរាជ ត្រូវបានអ្នកនិយម លេងអ៊ិនធើណេត ធ្វើរិះគន់យ៉ាងចាស់ដៃ បន្ទាប់ពីគេបានឃើញថា តារាចម្រៀងរូបនេះ ចម្លងយកបទអ្នកចម្រៀងល្បីរបស់ថៃ មកច្រៀង កាលពីពេលថ្មីៗនេះ។ បទចម្រៀង ដែលទើបនឹងលេចចេញនូវការរិះគន់នេះ បកស្រាយដោយតារាចម្រៀង របស់ផលិតកម្មហង្សមាស លោក ឆន សុវណ្ណរាជ មានចំណងជើងថា “ចោលបង ទៅស្នេហ៍អ្នកណា?” ដែលបានចេញលក់លើទីផ្សារ ក្នុងស៊ីឌីវ៉ុល ៤១៩ កាលពីអំឡុងដើមឆ្នាំ២០១១ មកម្ល៉េះ។
មូលហេតុ ផ្ទុះការរិះគន់អំពីការលួចចម្លងនេះ ត្រូវបានធ្វើឡើង ក្រោយពេលដែល Page ក្នុងបណ្តាញទំនាក់ទំនង សង្គមហ្វេសប៊ុក ដ៏ធំមួយរបស់ថៃ ដែលមានអ្នកគាំទ្រប្រមាណជាង ២លាននាក់ យកមក Post ចែកគ្នាមើល និងបញ្ចេញយោបល់។ ក្រោយការ Post នេះ មានអ្នករិះគន់បញ្ចេញយោបល់ មិនក្រោម ២ពាន់នាក់ទេ។ អ្នកទាំងនោះ បាននាំគ្នាជជែក អំពីបទមួយនេះ ដោយផ្តោតសំខាន់លើប្រធានបទតែមួយ គឺផលិតកម្ម នៅកម្ពុជា លួចចម្លងបទចម្រៀងរបស់ប្រទេសថៃ។
ជាមួយគ្នា នោះ គេបានធ្វើការផ្គួរផ្គងបទចម្រៀងទាំងពីរទន្ទឹមគ្នា មានការបញ្ជាក់ដែរថា បទចម្រៀងដើមរបស់ថៃ មានចំណងជើងប្រែថា “និយាយហើយ ចង់តែស្រែកយំ” និងច្រៀងដោយតារាចម្រៀងថៃលោក Dr. Fuu ធ្លាប់បានបង្ហោះលើបណ្តាញYou Tube កាលពីអំឡុងឆ្នាំ២០១០ និងមានអ្នកចូលទស្សនាជាង ១១លានដង។បទចម្រៀង របស់តារាចម្រៀង ឆន សុវណ្ណរាជ វិញ ត្រូវបានបង្ហោះលើបណ្តាញ You Tube កាលពីអំឡុងឆ្នាំ២០១១ ដែលមានអ្នកចូលទស្សនាត្រឹមជាង ១ម៉ឺនដងប៉ុណ្ណោះ។
ទោះជាយ៉ាងនេះក្តី ពីក្រុមអ្នកស្រលាញ់សិល្បៈវប្បធម៌ខ្មែរ បានសម្តែងនូវការមិនសប្បាយចិត្ត នៅពេលដែលទទួលបាន ការមាក់ងាយ ពីជនជាតិដទៃ អំពីការលួចចម្លងស្នាដៃ ពីបរទេស មកដាក់លក់នៅលើទីផ្សារក្នុងស្រុកនេះ។ អ្នកខ្លះយល់ថា សិល្បៈវប្បធម៌ខ្មែរ ដែលធ្លាប់តែមានជនបរទេសចម្លងតាមនោះ ត្រូវបានសាបរលាប ក្រោយពេលផលិតកម្មក្នុងស្រុកជាច្រើន បន្តលួចចម្លងមកឲ្យតារាចម្រៀងរបស់ខ្លួនច្រៀទៅវិញ ហើយវាគឺក្តីអាម៉ាសមួយសម្រាប់អ្នកនិពន្ធក្នុងស្រុក។
កន្លងមក មានបទចម្រៀងមិនតិចទេ ដែលទទួលរងនូវការរិះគន់ពីសំណាក់ប្រជាជន ថៃនិងប្រជាជនកម្ពុជាផងដែរ ពីតារាចម្រៀងយើងមួយចំនួន គឺក្រោយពេលបទចម្រៀងជា ច្រើនបទនោះត្រូវបានគេរកឃើញថា បានលួចចម្លងដោយមិញញើត សូម្បីតែការសម្តែង និងអត្ថន័យនៃបទចម្រៀង។ ក្រៅពីការលួចម្លងពីប្រទេសនានា ប៉ុន្តែគេនៅមិនទាន់បាន ឃើញក្រសួងពាក់ព័ន្ធធ្វើការណែនាំណាមួយនៅឡើយ។យើងមិនអាចសុំការបកស្រាយពីតារាចម្រៀង ក៏ដូចជាអ្នកនៅផលិតកម្មហង្សមាស ដើម្បីបំភ្លឺឲ្យកាន់ច្បាស់លាស់បន្ថែមទៀតនោះទេ។
អ្នកសង្កេតការណ៍និយាយថា តាមពិតទង្វើខាងលើ ជាការរំលោភលើកម្មសិទ្ធិបញ្ញា ដែលមានចែងដោយកតិការអន្ដរជាតិ។
ពួកគាត់និយាយថា “ខណៈដែលអង្គការពាណិជ្ជកម្មពិភពលោក ដាក់ការតម្រូវអំពីច្បាប់កម្មសិទ្ធិបញ្ញានេះ និងខណៈដែលខ្មែរចូលក្នុងសហគមន៍អាស៊ាន នាឆ្នាំ២០១៥ ខាងមុខនោះ ការលួចចម្លងខាងលើ ជាកម្មវត្ថុនៃបណ្ដឹង ដែលអាចធ្វើឱ្យក្រុមហ៊ុនក្ស័យធនក៏ថាបាន”៕
