លោក សម រង្ស៊ី នឹងមកដល់កម្ពុជាវិញនៅព្រឹកថ្ងៃអង្គារនេះ
ប្រធានគណបក្សសង្គ្រោះជាតិ លោក សម រង្ស៊ី នឹងមកដល់កម្ពុជានៅព្រឹកថ្ងៃអង្គារនេះ បន្ទាប់ពីការចំណាយរយៈពេល២សប្តាហ៍នៃដំណើរការទូតរបស់លោក ដើម្បីស្វែងរកដំណោះស្រាយនៃការបោះឆ្នោតនៅកម្ពុជា។
អនុប្រធានគណៈកម្មាធិការវិន័យរបស់គណបក្សសង្គ្រោះជាតិ លោក ហូរ វ៉ាន់ មានប្រសាសន៍ថា លោក សម រង្ស៊ី នឹងមកដល់កម្ពុជាវិញ នៅថ្ងៃព្រឹកវេលាម៉ោង៩ ថ្ងៃអង្គារ ទី២២ខែតុលានេះ ហើយនឹងដឹកនាំមហាបាតុកម្មលើកទី៣នៅថ្ងៃពុធស្អែកនេះ។
លោក សម រង្ស៊ី ដែលបានចាកចេញពីកម្ពុជា កាលពីថ្ងៃទី០៧ខែតុលា បានស្វែងរកអន្តរាគមន៍ពីសហគមន៍អន្តរជាតិ ដោយបានឆ្លងកាត់ការធ្វើដំណើរនៅអឺរ៉ុប និងអាមេរិក។ ក្នុងដំណើរទស្សនកិច្ចនៅក្រៅប្រទេស លោក សម រង្ស៊ី ក៏បានឆ្លងកាត់ប្រទេសអង់គ្លេស បារាំង និងប្រទេសបែលហ្សិក។
កាលពីកន្លងទៅ ក្នុងទីក្រុងវ៉ាស៊ីនតោន បន្ទាប់ពីបេសកកម្មរបស់លោកបញ្ចប់នៅអឺរ៉ុប និងអាមេរិក លោក សម រង្ស៊ី មានប្រសាសន៍ថា រដ្ឋាភិបាល និងសភានៅក្នុងប្រទេសអឺរ៉ុប និងសហរដ្ឋអាមេរិក រួមទាំងប្រទេសជាច្រើនទៀត បានគាំទ្រគោលជំហររបស់គណបក្សសង្គ្រោះជាតិ ក្នុងការទាមទារឲ្យមានការស៊ើបអង្កេតឯករាជ្យមួយពីភាពមិនប្រក្រតីនៃការលួចបន្លំសន្លឹកឆ្នោត។ លោកបានបញ្ជាក់ថា សហភាពអឺរ៉ុប និងប្រទេសដទៃទៀត បានសម្តែងនូវមន្ទិលសង្ស័យនៃលទ្ធផលបោះឆ្នោតនេះ។
គណបក្សសង្គ្រោះជាតិ គ្រោងនឹងចាប់ផ្តើមធ្វើមហាបាតុកម្មលើកទី៣ រយៈពេលបីថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែតុលា។ មហាបាតុកម្មលើកទី៣នេះ ក៏មានការដង្ហែក្បួនដើម្បីយកញត្តិភ្ជាប់ស្នាមមេដៃ ដាក់ជូន អង្គការសហប្រជាជាតិ និងដាក់ស្ថានទូត ប្រទេសភាគីហត្ថលេខី នៃកិច្ចព្រមទីក្រុងប៉ារីស៕
ប្រភពពី Camnews
