នាយក្រូច ស្ទុះប្រជែង ពែកមី
ខណៈ នាយ ពែកមី ក្តាប់បានតំណែងថ្មីជាតារាចម្រៀង និងសម្តែងក្នុងខ្សែរឿង នាយក្រូច ឯណេះវិញ ក៏មានសន្ទុះមិនធម្មតា ដោយថ្មីៗនេះនាយទើបឆក់បានតំណែងតួឯកលើកដំបូងក្នុងរឿង “សើចអីខ្លាចតើ!” របស់ផលិតកម្ម RGB ។ នាយ ក្រូច ប្រាប់ថា នឹងធ្វើឱ្យអ្នកទស្សនាសើចរហូតចុកពោះមិនខាន ក្រោយចូលឆ្នាំខ្មែរហើយ។នេះជាលើកទីមួយហើយ សម្រាប់វត្តមានតួឯករបស់តារាកំប្លែងល្បីឈ្មោះនាយក្រូច។ លោកបានអះអាងថា ចាប់តាំងពីការប្រឡូកចូលជាតារាកំប្លែងមក លោកមិនដែលបានសម្ដែងជាតួឯកម្ដងណានោះទេ គឺធ្វើតែតួរង និងតួចាស់ជាដើមក្នុងខ្សែភាពយន្តក៏ដូចជាការសម្ដែងក្នុងឈុតឆាក កំប្លែង។ ដូច្នេះហើយ ទើបតារាកំប្លែងរូបនេះ ប្រាប់ថា លោកសប្បាយរីករាយមែនទែន នៅពេលផលិតកម្ម RGB ផ្ដល់តំណែងជាតួអង្គសំខាន់បែបនេះ។
នាយ ក្រូច និងប្អូនស្រីនាង អ៊ិត ក្នុងពិធីក្រុងពាលីរឿងម្សិលមិញ
ក្នុង
ពិធីក្រុងពាលីរឿង “ខ្លាចអីសើចតើ!” រសៀលម្សិលមិញនេះ
នាយក្រូចបានបញ្ជាក់ថា
“ខ្ញុំនឹងប្រឹងប្រែងធ្វើយ៉ាងណាឱ្យទស្សនិកជនចាប់អារម្មណ៍បំផុត
ក្នុងពេលខ្ញុំបានតំណែងតួឯកលើកដំបូងនេះ
ព្រោះដូចប្រាប់ពីខាងលើអីចឹង
ខ្ញុំមិនដែលបានតំណែងបែបនេះទេតាំងប្រឡូកចូលសិល្បៈមក”។តារា កំប្លែងដែលផ្ដើមដោយការប្រលងជាប់នៅក្នុងស្ថានីយទូរទស្សន៍ CTN ក្នុងកម្មវិធី”មហាកំប្លែង” រូបនេះ បានបន្ថែមទៀតថារឿង “ខ្លាចអីសើចតើ!” នឹងធ្វើឱ្យទស្សនិកជនសើចចុកពោះតាំងពីដើមរហូតដល់ចប់។ យ៉ាងណាក៏ដោយតារាកំប្លែងមកពីខេត្តកំពង់ស្ពឺរូបនេះ បានស្នើដល់ទស្សនិកជន ឱ្យជួយគាំទ្រសម្រាប់ការសម្ដែងជាតួឯកលើកដំបូងនេះរបស់នាយផង។
ដោយ ឡែកអ្នកដឹកនាំរឿងក្នុងផលិតកម្ម RGB លោក លៀង ខេងហេង បានលើកឡើងថា ខ្សែភាពយន្តខាងលើនឹងអាចទាក់ទាញការគាំទ្របានច្រើន ពីទស្សនិកជននៅពេលដាក់បញ្ចាំង ព្រោះមុននេះ ផលិតកម្មបានសិក្សាច្បាស់លាស់ពីតម្រូវការរបស់ទស្សនិកជនរួចរាល់ ហើយ។
លោក លៀង ខេងហេង បានបន្តថា ខ្សែភាពយន្តនេះ គ្រោងប្រើរយៈពេលថតប្រមាណ១ខែ ហើយចំពោះការចំណាយដើមទន់វិញក្រោម១០ម៉ឺនដុល្លារ ពោលគឺលើសការចំណាយលើការផលិតរឿង “ព្រាយភ្នែកបួន” ទៅទៀត។
តាម ការបញ្ជាក់របស់អ្នកដឹកនាំរឿងរូបនេះ គឺថា រឿង “សើចអីខ្លាចតើ” នេះ និយាយពីមិត្តភ័ក្ដិបួននាក់រៀនថ្នាក់រួមគ្នា តែមានចរិតលក្ខណៈខុសគ្នាទាំងស្រុង។ អ្នកទាំង៤នេះ មានទីមួយនាយ សាច់កម្ម ធ្វើអ្វីៗខុសរហូត មិនដែលត្រូវម្ដងណាទេ សម្ដែងដោយ នាយក្រូច តែម្តង។ ទីពីរនាយ ម៉ាប់ ពូកែតែខាងស៊ី សម្ដែងដោយពិធីករលោក BIG។ ទីបីនាយ ញែក មានចរិតលក្ខណៈម្ញ៉ិកម្ញ៉ក់ សម្ដែងដោយលោក បញ្ញាសិទ្ធិ និងទីបួននាយ សង្ហា ជាប្រុសស្អាតសម្ដែងដោយឌីជេ តាប៊ុយ។
ខ្សែភាពយន្តរឿង “ខ្លាចអីសើចតើ!” ដែលនាយក្រូចធ្វើជាតួឯកនោះនឹងចាប់ផ្ដើមថតនៅថ្ងៃទី ២៥ ខែមេសា ឆ្នាំ២០១៣គឺក្រោយចូលឆ្នាំប្រពៃណីខ្មែររួច។
ដោយឡែក នាយក្រូច ដែលជាតួឯកក្នុងរឿងខាងលើនេះ ជាតារាកំប្លែងល្បីឈ្មោះម្នាក់របស់ CTN ក៏ដូចជានៅក្នុងពិភពសិល្បៈ។ លោកកើតនៅថ្ងៃទី ៥ ខែកុម្ភៈ ឆ្នាំ១៩៧៩ ក្នុងខេត្តកំពង់ស្ពឺ។ តារារូបនេះមានប្អូនស្រីម្នាក់ក៏ជាតារាកំប្លែងល្បីឈ្មោះផងដែរ នោះគឺនាង “អ៊ីត” ជាតារាកំប្លែងរួមក្រុមនាយ ពែកមី ដូចគ្នា៕